बर्दिया । समाजमा शान्ति–सुरक्षा कायम गर्न प्रहरीको भूमिका जति महत्वपूर्ण छ, नागरिकलाई सही र तथ्यपरक सूचना प्रदान गर्न पत्रकारिताको भूमिका पनि उत्तिकै महत्वपूर्ण हुन्छ। यही विषयलाई केन्द्रमा राख्दै बर्दियामा सञ्चालन भइरहेको पत्रकारिता तालिममा बर्दियाका प्रहरी प्रमुख एसपी सरोज पौडेलले प्रहरी र पत्रकारबीचको सम्बन्ध तथा सहकार्यबारे आफ्नो धारणा प्रस्तुत गरेका छन्।

पौडेलले प्रहरी र पत्रकार समाजका फरक क्षेत्रमा काम गर्ने भए पनि दुवैको अन्तिम उद्देश्य नागरिकको हित र समाजमा सकारात्मक परिवर्तन ल्याउनु रहेको बताए। प्रहरीसँग भएका सूचना तथ्यपरक रूपमा सार्वजनिक गर्न र पत्रकारले त्यसलाई जिम्मेवार ढंगले नागरिकसम्म पुर्‍याउन सके समाजमा विश्वासको वातावरण निर्माण हुने उनको धारणा थियो।

उनले प्रहरीका गतिविधि, अपराध अनुसन्धान, शान्ति–सुरक्षा तथा नागरिकसँग सम्बन्धित विषयमा समाचार सम्प्रेषण गर्दा तथ्यको पुष्टि, संवेदनशीलता र पत्रकारिताको जिम्मेवारीलाई ध्यान दिनुपर्नेमा जोड दिए। गलत वा अपुष्ट सूचनाले अनुसन्धान प्रभावित पार्नुका साथै नागरिकमा अनावश्यक भ्रमसमेत सिर्जना गर्न सक्ने भएकाले प्रहरी र सञ्चारकर्मीबीच नियमित संवाद आवश्यक रहेको उनले बताए।

प्रहरी र पत्रकारबीचको सम्बन्ध केवल सूचना माग्ने र दिने सम्बन्धमा सीमित हुनु हुँदैन। प्रहरीबाट प्राप्त सूचनाको सत्यता परीक्षण गर्दै नागरिकको अधिकार र सार्वजनिक हितलाई केन्द्रमा राखेर समाचार सम्प्रेषण गर्नु पत्रकारको जिम्मेवारी हो भने पारदर्शी र विश्वसनीय सूचना उपलब्ध गराउनु प्रहरीको पनि दायित्व हो।

यही कारण प्रहरी र पत्रकारबीच अविश्वास होइन, विश्वास, संवाद र सहकार्यको सम्बन्ध विकास गर्नुपर्ने आवश्यकता देखिन्छ। विशेषगरी अपराध, दुर्घटना, विपद् तथा संवेदनशील घटनाका समयमा गलत सूचना तीव्र गतिमा फैलिन सक्ने भएकाले जिम्मेवार पत्रकारिता अझ महत्वपूर्ण बन्न पुग्छ।

यसअघि सोही पत्रकारिता तालिममा जिल्ला ट्राफिक कार्यालय बर्दियाका प्रमुख सन्दीप बेल्बासेले ट्राफिक नियम तथा सडक सुरक्षासम्बन्धी प्रशिक्षण दिएका थिए। ट्राफिक नियमको पालना, दुर्घटना न्यूनीकरण र नागरिकमा सडक सुरक्षासम्बन्धी चेतना फैलाउन सञ्चारमाध्यमको भूमिकामाथि उनले जोड दिएका थिए।

गुलरिया नगरपालिकाको आयोजनामा सञ्चालित तालिमले पत्रकारलाई समाचार लेखनको सीप मात्र होइन, प्रहरी, प्रशासन र नागरिकबीचको सम्बन्धलाई जिम्मेवार सञ्चारमार्फत कसरी मजबुत बनाउन सकिन्छ भन्ने विषयमा समेत ध्यान केन्द्रित गरेको छ।
प्रहरीसँग तथ्य, पत्रकारसँग कलम र नागरिकसँग जान्ने अधिकार हुन्छ। यी तीन पक्षबीचको सम्बन्ध विश्वासमा आधारितहुन सके मात्र सूचना जिम्मेवार ढंगले प्रवाह हुन्छ र समाज थप सुरक्षित, सचेत तथा उत्तरदायी बन्न सक्छ।